Helper nga nagtambong sa birthday party sang iya utod, patay matapos nga bun-on.

Dead on arrival ang helper matapos makaangkon sang pilas tuga sang pagpamuno kahapon sang kaagahon sa Purok Arellano, Barangay Colonggulo, Surallah, South Cotabato.
Ginkilala ang biktima kay Jefferson De Asis Sustento, 26-anyos, kasado, residente sang Sitio Sibuyon, Barangay Lake Lahit, Lake Sebu, South Cotabato samtang ginkilala naman ang suspek kay Marvin Arellano, soltero, legal ang pang-idaron kag residente sang Purok Arellano, Barangay Colonggulo, Surallah, South Cotabato.
Sa imbestigasyon sang Surallah PNP, nagtambong sa birthday party ang biktima sa iya utod nga babaye sa nasambit nga lugar.
Sa tunga sang kasadyahan kag dala sang epekto sang makahulubog nga ilimnon nagluntad ang pagbinaisay sa pamilya sang biktima batok sa pamilya sang suspek.
Sang nakatiyempo ang nasambit nga suspek hinali na lang nga ginsaroso ang biktima kag ginbuno sa wala nga dughan.
Bangud sa insidente, gilayon nga gindala ang biktima sa Upper Valley Community Hospital sa nasambit nga banwa, apang gindeklara ini nga dead on arrival sang doctor nga nag-atipan.
Samtang, nalagyo naman ang suspek matapos nga nahimo ang krimen dala ang kutsilyo nga gingamit sa krimen.
Nagpatigayon naman sang follow-up operation ang Surallah PNP sa posible pagkadakop sa suspek.

Facebook Comments