Hepe sa Fatima PNP may pahimango sa iyang mga sakop

16

General Santos City–Gikabutyag ni Police Captain Wennie Perez ang Deputy Station Commander sa Fatima PNP nga wala gayud nagkulang ang ilang opisyal sa pagpahimangno sa iyang ginsakpan nga likayan ang pakiglambigit sa unsa mang illegal nga gimbuhaton.

Matud pa sa opisyal nga makabungol na ang sige ug pahinumdum apan duna gayuy kaubanan nila nga wala gihatagan ug dakong bili nga makatabang unta sa iyang trabaho.


Pagpaklaro pa niini nga kung mapatud-an gayud nga lambigit ang usa ka pulis sa illegal nga droga awtomatiko kining i-relieve ug posibleng matanggal pa sa trabaho.

Dugang saysay ni Perez nga dili dapat anaa sa serbisyo sa PNP ang kaubanan niining nagpositibo sa droga gumikan kay dili maayo sa mata sa publiko nga imbes sila mismo ang nagapatuman sa balaod mao pa hinuon ang magpasaway.

Giangkon usab ni Perez nga wala sila nagpasagad sa ilang mga sakop gani ilaha kining ginamonitor apan dili sa tanang panahon ug gipaniguro niini nga si kinsa man nga nagahimo ug illegal nga gimbuhaton kinahanglan gayud nga mahatagan ug tukmang silot.

Kahibaloan nga duha ka pulis sa Rehiyon 12 ang nagpositibo sa gipahigayong random drug test sa PRO 12 niadtong milabay nga bulan kung asa usa niini ang personahe sa Fatima PNP nga kasamtangan anaa na sa GSCPO Personnel Holding Unit.(Reynald Timario)

Facebook Comments