Hepe sa PNP Carmen sa North Cotabato, patay sa pagpamusil

45

North Cotabato–Patay ang Hepe sa Carmen Municipal Police Station sa probinsya sa North Cotabato human nga gipaulanan ug bala sa wala pa mailhing mga suspetsado samtang kini nagpahigayon matud pa ug pursuit operation.

Giila ang namatay nga opisyal nga si Police Major Joan Resurreccion. Base sa inisyal nga imbistigasyon, alas 10:00 sa buntag, nakadawat matud pa ug report ang Carmen Municipal Police Station nga may nahitabong pagpamusil sa Barangay Poblacion kung asa biktima niini usa ka Indian national.

Gilayong miresponde ang tropa ni Maj. Resurreccion diin gilayon nga gihimo ang pursuit operation batok sa mga suspetsado. Apan pag-abot sa tropa sa kapulisan sa quarry site nga sakop sa Barangay Tawantawan kalit silang giratratan sa gituohang miyembro sa lawless armed group.

Naigo si Resurreccion, hinungdan sa iyang kamatayon. Sa karon padayon ang gihimong imbestigasyon sa kapulisan kalabutan sa insidente, samtang padayon usab ang gihimong paggukod batok sa mga suspetsado.

Facebook Comments