High value target sa kapulisan patay sa operasyon

General Santos City–Dead on arrival sa Dr. Jorge Royeca Hospital ang usa ka myembro sa BCCF sa Purok Opring, Barangay Calumpang ning syudad nga si Camelo Jusayan, 53 anyos, usa ka panday human nga misukol matud pa kini sa mga otoridad.

Unang gihimo ang usa ka operasyon sa mga personahe sa Regional Police Drug Enforcement Unit-12 kun RPDEU-12 alas 2:30 ang takna sa kadlawon sa panimalay niini sa nasangpit nga lugar.

Nakuha sa posisyon niini ang usa ka homemade nga .38 revolver nga dunay 3 ka buhing bala, ingon man 18 ka sachet sa gikatahapang shabu nga gibana-banaang nagtimbang ug usa ka gramo ug nagkantidad ug P6,800.


Sumala pa sa anak niini nga si Mae Ann, gisulod ang ilang panimalay sa mga pulis ug gipahapa ang tanan nga anaa suldo sa ilang balay, dihang matumbok ang ilang amahan, didto na sila gipagawas ug gibilin ang iyang amahan.

Gibira matud pa sa mga pulis sa kwarto ang iyang amahan ug pipila lang ka minutos ang nakalabay, nakadungog nalang sila ug sunod-sunod nga buto sa pusil ug didto ila nalang nakit-an nga bitbit na sa mga Police ang iyang amahan nga nagkadugo na ug gidala sa ospital.

Dako usab ang pagtuo Mae Ann nga planted ang mga ebidensya nga nakuha sa mga pulis sa iyang amahan tungod wala matud pay armas ang iyahang amahan ug wala usab kini nahilambigit sa pag pamaligya ug iligal nga droga.

Samtang gihingusgan ni Police Major Rexor Canoy, ang tigpamaba sa General Santos City Police Office nga lihitimo ang gihimo nilang operasyon. Gihingusgan usab niini nga walay basehan ang alegasyon sa pamilya sa target nga planted ang mga ebidensya nga ilang nakuha.

Sumala pa niini nga dili trabaho sa Police ang pag butang-butang ug ebidensya, ayha matud pa gihimo ang operasyon gipailawom una sa pipila ka semana nga surveillance ang target ayha ipatuman ang search warrant.

Dugang pa niini nga anaa ang presensya sa media ug mga Purok official sa matag operasyon aron nga makaseguro nga lihitimo kini. Ang mga susamang alegasyon normal lang matud pa nga reaksyon sa mga pamilya sa ilang target.(CDS)

Facebook Comments