Naniniwala si House Prosecution Team member Batangas 2nd District Rep. Gerville Luistro na hindi pagbibigyan ng Supreme Court ang hiling na Temporary Restraining Order para pigilan ang impeachment proceedings laban kay Vice President Sara Duterte.
Para kay Luistro, walang sapat na basehan ang Kataas-Taasang Hukuman para mag-isyu ng TRO laban sa impeachment complaint na inendorso ng Kamara sa Senado na syang impeachment court.
Ayon kay Luistro, hindi totoo ang argumento ng mga naghain ng petisyon na may pagkakamali sa verification process ng impeachment complaint dahil sumunod ito sa rules ng Kamara.
Itinanggi din ni Luistro ang alegasyon na ang verification page ay isiningit lang matapos maipadala sa Seando ang impeachment complaint.
Diin ni Luistro, ang 215 mga kongresista na nag-endorso sa reklamong impeachment ay lumagda sa harap ng House Secretary General sa isang caucus noong February 5.
Giit pa ni Luistro, hindi rin ni-railroaded o minadali ng kamara ang pagpapa-impeach sa bise presidente dahil nagkaroon sila ng pagkakataon na pag-aralang mabuti ang tatlong impeachment complaint na inihain noong 2024 na syang pinagbasehan ng ikaapat na impeachment complaint na syang ini-akyat sa senado.
