Hubog nangisda, nalumos-patay

Davao City – Gibutyag sa kapulisan nga walay foul play ang pagkamatay sa usa ka lalaki nga nakaplagan sa Purok Dapsa, Barangay Mandug, Davao City alas-10:30 sa buntag kagahapong adlawa (Pebrero 16, 2021).

Sa interbyu sa DXDC RMN Davao kang Patrolman Jason Deng sa Mandug PNP, giila niini ang biktima nga si Mark Joel Agusan, 29-anyos, minyo, construction worker, residente sa Purok 3 Gumalang Alcantara, Baguio District, Davao City.

Gisaysay sa patrolman nga niadto pang Domingo, Pebrero 14, 2021 na-missing ang biktima human kini nangisda nga hubog o lango sa ilimnon, diin nakit-an na lamang kining patay na kagahapon sa buntag, ug gituohan nga nalumos.


Pahimangno sa pulis nga likayan ang pag-inom labi na nga kini gibawal dinhi sa syudad tungod sa ginapatumang 24-hour liquor ban ug aron malikayan usab ang unsa mang disgrasya.

“Kung diri lang sa atoa sa Davao, bawal man gyud ‘ta mag inom. Kung makainom gyud ‘ta, dili malikayan nang liquor, dili nalang ‘ta muadto anang mga sapa. Itulog nalang,” tambag niini.

RadyoMaN Kirby Manzon

Facebook Comments