Hubog nga pulis aksidenteng nakapusil-patay

Davao City – Kasong Reckless Imprudence Resulting to Homicide ang atubangon sa usa ka police personnel nga aksidenteng nakapusil-patay sa Maragusan Municipal Complex, Davao de Oro pasado alas 7:00 sa gabii niadtong Huwebes (November 24, 2022).

Sa interbyu sa DXDC RMN Davao kang Patrolman Cris John Regidor, imbestigador sa Maragusan Municipal Station (MPS), giila niini ang suspek nga si Patrolman Ryan Domenise, hamtong, personahe sa New Bataan MPS, ug residente sa Poblacion, Maragusan, Davao de Oro.

Samtang ang biktima mao si Cerbando Hinayon, 58 anyos, ug residente sa Mati City, Davao Oriental.

Sa inbestigasyon, naka-off duty ang suspek nga pulis niadtong higayona diin tungod kay lango kini sa ilimnon, aksidente niining nakablit ang iyang Glock 17 9 mm pistol ug naigo ang miagi nga biktima nga dayo ra usab sa maong lugar atol sa bisperas sa Araw ng Maragusan.

“Accidentally nga iyahang gibundak ang iyahang baril siguro sa kahubog na niya. Wala niya namalayi ba kay hubog na man siya kaayo. Mao ‘to nga na-press niya ang trigger kay iyahang gihapak sa lamesa,” saysay sa imbestigador.

Gisulayan pa og dala sa Davao De Oro Provincial Hospital ang biktima apan gideklara na kining dead on arrival.

RadyoMaN Kirby Manzon

Facebook Comments