Ihap sa nataptan sa Covid -19 sa probinsya dul-an 500 na

Pagadian City – Nikabat sa 59 ang nadugang nga kompermadong kaso sa Covid-19 sa probinsya sa Zamboanga del Sur kagahapon lamang adlawa.
Hinungdan nga nipatong na sa 486 ka pasyente ang gi-atiman ug gi-obserbahan niining panahon sa tibook probinsya.
Ang datos nga nahipos gikan sa labing ulahing talaan nga gipagula sa Integrated Provincial Health Office (IPHO).
Nag-una gihapon sa listahan ang dakbayan sa Pagadian nga mitala og 224 ka aktibong kaso gisundan sa lungsod sa Aurora adunay 29 ka pasyente nga gi-atiman, 23 ang nataptan sa Tigbao ug lungsod Labangan 24 ka indibidwal.
Samtang natala usab kagahapon og 7 katawo ang gipagawas na ug hingpit nang nakalingkawas sa virus apan dunay usa nga nataptan pagbalik.
Gumikan sa paspas nga pagsaka sa kaso subling nagpahimangno ang Provincial Task Force sa tanang local government units (LGUs) sa strektong pagpatuman sa mga gilatid nga polisiya sa Executive Order nga gipagula sa kagmahanang probinsyal ug mogahin og Temporary Treatment Monitoring Facility aron kabutangan sa mga pasyente.

Facebook Comments