Ika-287 nga sunog sa syudad miulbo sa Maa

38

Davao City- Miulbo ang ika-287 nga sunog sa may Diversion Road, Maa ning syudad sa Davao kaganina bandang alas 3:30 sa hapon.

Sa interview sa DXDC RMN Davao kang SFO1 Felix Amistad sa SIR Fire station, base sa ilang report, dunay lima ka balay nga gama sa light materials ang naugdaw sa maong sunog diin sagad sa mga nasunogan walay nasalbar nga mga gamit.

Dugang ni Amistad, dunay duha ka bata ang napaso ug gidala sa balay-tambalanan.

Gituuhang electrical short circuit ang hinungdan bisan pa man dunay mga nag ingon sa maong dapit nga posporo nga gidulaan sa mga bata ang rason sa maong sunog apan padayon gihapong ginatino sa mga imbestigador ang hinungdan sa pag-ulbo sa kalayo.

Gideklarang fire out sa mga bombero ang sunog alas 5 na sa hapon ug gibana-banaang mokabat sa 150,000 pesos ang damyos niini diin ang maong sunog maoy ika 287 nga sunog nga natala sa Bureau of Fire Protection kun BFP karong tuiga sugod Enero diin mas ubos kini kun itandi sa milabayng tuig.

Padayong pahimangno sa BFP ngadto sa katawhan nga likayan ang electrical overload ug dili ibilin nga nakasaksak ang mga appliances og mulakaw sa panimalay aron makalikay sa sunog.

RadyoMaN Renz Barbarona

Facebook Comments