Nadakpan na ang iladong miyembro sa Communist Terrorist Group-New People’s Army-National Democratic Front (CTG-NPA-NDF) nga adunay patong sa ulo nga mukabat sa P5.3M atol sa hiniusang operasyong gipahigayon sa mga kapulisan ug kasundaluan kagahapong adlawa didto sa Purok-4, Brgy. Paitan, Quezon, Bukidnon.
Giila ang iladong miyembro nga nadakpan nga si Loida Tuzo Magpatoc alias Debyang, 60 anyos ug mulopyo sa Purok 6, Barangay Bitan-agan, Butuan City.
Si Debyang ang gikonsiderang NDF Consultant ug kanhi Secretary sa Front Southern Mindanao Regional Committee (FSMRC) nga adunay kinatibuk-ang patong sa ulo nga mukabat sa P5,350,000.00.
Patong-patong nga kasong Robbery with Double Homicide and Damage to Property ug Rebellion ang atubangon sa suspetsado.
Temporaryong gitingkagol na sa Valencia City Police Station ang dinakpan alang sa tokmang disposasyon.
