Imbestigasyon sa pagputol sa mga kahoy sa Marilog nagpadayon

Davao City- Nagpadayon ang imbestigasyon sa Committee on Environment and Natural Resources sa Davao City Council sa pagputol sa mga kahoy nga gitanom sa Upper Kibalang, Brgy. Marilog Proper ning syudad.

Gibutyag ni Councilor Tek Ocampo, chairperson sa City Council Committee on Environment and Natural Resources, gikatakdang mulusad og committee hearing diin giimbitahan ang Barangay, Department of Public Works and Highways, City Engineers Office, Department of Education ug uban pang concerned nga mga opisina.

Gikadismaya sa konsehal ug gikatingad-an sa konseho ang pagputol sa mga kahoy nga gitanom para sa flood ug landslide mitigation.

Nangunay mismo kini sa pagimbestiga ug pagsuta sa area diin aduna nay gisugda’g tukod nga eskwelahan ang maong lugar.

Matud ni Ocampo, gipahunong na sa City Environment and Natural Resources Office ang pagputol sa kahoy sa lugar.

Giklaro ni Ocampo nga dili siya babag sa mga proyekto apan siya mismo nahibulong nganong wala man lang nasayod ang lokal nga gobyerno sa nasangpit nga development.

Gipaabot niini ang report sa Mines and Geo-sciences Bureau (MGB) kansang nagbutyag nga ang maong lugar highly susceptible sa landslide.

RadyoMaN Aimee Guinita

Facebook Comments