Imbestigasyon sa Panzan abduction dili maapektuhan sa Bragas rape slay

Davao City- Nagpadayon ang Talomo Police Station sa pagsulbad sa Dennis Panzan abduction case.

Sumala ni Police Major Noel Villahermosa, Talomo Police Station Commander, dili maapektuhan ang imbestigasyon human nga gitudlo si Dennis Panzan sa Special Investigation Task Group nga usa sa mga suspek sa paglugos patay kang Arch. Vlance Marie Bragas.

Sa kasamtangan, blangko pa ang kapulisan kung kinsa ang mga responsable sa pagdagit kang Panzan.

Kahinumduman gireport sa iyahang mga kabanay nga nawala kini niadtong Mayo 26 sa gabie adlawng Biyernes.

Sa report nakaikyas kini sa mga tawong ni-abduct kaniya ug nagpatabang kini niadtong Mayo 29, 2023 sa pamilyang Cadungog sa Barangay Matina Aplaya.

Ang biktima nakabalot og packaging tape ang tibuok nawng ug nakaposas ang mga kamot dihang giendorso sa Talomo Police Station sa mga opisyales sa Barangay Matina Aplaya.

Na-collapse, nag-seizure kini ug naglisod og ginhawa dihang gidala na kini sa ospital diin nabugtuan usab kini sa iyahang kinabuhi.

Sumala sa amahan, adunay mga bun-og sa kalawasan ug giingong paso sa sigarilyo si Dennis.

Padayong nanawagan ang mga kabanay ug mga higala ni Dennis Panzan og hustisya sa kamatayon niini.

RadyoMaN Aimee Guinita

Facebook Comments