Davao City – Dili kumbensido ang inahan sa 18 anyos nga dalaga nga nagpakamatay ang iyang anak gamit ang kutsilyo nga iyang giingong gidunggab sa iyang kaugalingon sulod sa ilang panimalay sa may San Isidro, Jade Valley Subdivision, Brgy. Tigatto ning syudad sa Davao.
Sa ekskusibong interbyu sa DXDC RMN Davao sa inahan nga si Divina Alboroto posibleng gidunggab-patay sa iyang ka-live in partner nga si Alvin Ozowa, 26 anyos ang iyang anak.
“Dili ko mutuo nga nagpakamatay akong anak, daghan pod kaayo siya’g bun-og sa iyang lawas mura pod ba’g gisulayan og lugos gani,” matud ni Divina.
Sumala niini buot niyang madakpan ug pursigido kining pasakaan og kaso ang kapuyo sa iyang anak.
“Nanawagan ko sa kapulisan nga imbestigahan ang kamatayon sa akong anak ug nangayo ko’g hustisya nga atubangon kini ni Alvin,” sumala niini.
“Malubong lang ni akong anak pasakaan nako’g kaso ang lalaki,” dugang niini.
Gihaya karon sa ilang panimalay sa Purok 4, Brgy. 76-A Bucana ning syudad.
RadyoMaN Aimee Guinita
