Davao City – Dead on arrival ang usa ka iro nga ginganlang Gabriela human kini gidunggab sa usa ka pulis nahitabo sa Magallanes ning syudad sa Davao.
Sa Facebook post sa Pet Avenue, usa ka grupo sa mga pet rescuers sa Pilipinas, mibisita matud pa ang usa ka wala gipanganlang pulis sa usa ka compound sa nahisgutang lugar aron makig dula og mahjong.
Apan gimalas ang pulis ug nahimong irritable rason nga gipagawas niini ang kutsilyo dayon dunggab sa iro nga duol kaniya.
Gisulayan pa og dala si Gabriela sa Shrine Pet Care Center apan deklarado na kining DOA gumikan sa nahiagumang dunggab nga miabot sa tina-e niini.
Makita sa nagakalat nga video sa Facebook nga grabeng kahisubo ang gibati sa amo niini samtang gitrapuhan ang dugo nga nibalot sa iyang alaga.
Matud ni LhonMar Survivor, ig-agaw sa tag-iya sa napatay’ng iro, mahadlok ang amo nga mosumbong sa kapulisan sanglit usa usab ka pulis ang suspetsado.
Sa pagkakaron padayong ginatutukan sa maong grupo ang kaso ni Gabriella ingon man ang susamang kaso nila Coco ug Brownie sa Agusan diin usab kini walay kalooy nga gipatay.
RadyoMaN Jason Amisola
