Inilabas na ng Department of Labor and Employment (DOLE) ang Implementing Rules and Regulations (IRR) ng work from home law.
Sa ilalim ng Republic Act 11165 o Telecommuting Act, pinapayagan ang mga manggagawa ng pribadong sektor na magtrabaho sa labas ng kanilang opisina sa pamamagitan ng telecommunication o computer.
Ayon kay Labor Secretary Silvestre Bello III – magiging epektibo ito 15 araw matapos itong mailathala sa pahayagan at sa website ng kagawaran.
Base sa IRR, ang employer ng isang pribadong sektor ay maaaring mag-alok ng telecommuting program sa mga empleyado nito sa voluntary basis o resulta ng collective bargaining.
Para sa epektibong pagpapatupad ng telecommuting program, ang employer at employee ay dapat tumalima sa mutually agreed policy o telecommuting agreement.
Nakapaloob sa IRR ang applicable code of conduct and performance evaluation and assessment; alternative workplace; use and cost of equipment; observance of data privacy at occupational safety and health.
Sa ilalim ng batas, lahat ng telecommuting employees ay mag-e-enjoy sa sumusunod na arrangements:
- Matatanggap ng rate of pay, kabilang ang overtime at night shift differential at iba pang kaparehas na monetary benefits
- Karapatan sa rest periods, regular holidays at special non-working days
- Pantay na workload at performance standards gaya ng mga empleyadong pumapasok sa opisina
- May access din sa training at career development opportunities
- Sasailalim din sa kinakailangang training sa technical equipment, at sa characteristics at conditions ng telecommuting
- Parehas ang collective rights sa mga empleyadong pumapasok sa opisina
