Isa ka mangingisda ang missing kag duha ang nakaluwas matapos magkulob ila ginasakyan nga bangka sang ginhampak sang pugada sang Domingo sang hapon sa kadagatan sang Carles, Iloilo.
Ginpahayag ni Mayor Segfred Betita nga ang nadula nga mangingisda ginkilala nga si Juncel Cudilla, 30 anyos samtang ang nakaluwas amo sanday Ruel Mahusay, 23 anyos kag Richard Bolohabo, lunsay pumuluyo sang Sitio Dapdap, barangay Lantangan, Isla Higantes.
Suno kay Mayor Betita nga nagsakay sa bangka ang tatlo ka mangingisda sang magtawhay na ang tiyempo sang Domingo sang hapon kag nagpadulong sa Bancal, Carles agud magbakal sang ice apang sa ila pagbalik samtang yara sa tunga lawod, ginhampak ang ila bangka sang pugada kabangdanan nga nagkulob ini.
Gin-anod sang balod sanday Mahusay kag Bolohabo pakadto sitio Naburot, Barangay Buenavista, Carles samtang nadula si Cudilla.
Ginpangita ini sang mga rescue groups apang wala gid makita kag padayunon subong sang Phil. Coast guard ang pagpangita sa nasambit nga mangingisda.
