Isa ka persona, patay sa bunggoanay sang motorsiklo kag Mitsubishi Montero SUV!

324

Roxas City, Capiz – Patay gid ang isa ka persona matapos nga nabunggo ang ginamaneho sini nga motorsiklo sa Mitsubishi Montero SUV sa Brgy Banica alas 12:50 sang kaaganhon.

Ginkilala ang napatay kay Ricardo Villanueva y Arquisola, 63-anyos sang Brgy Lawaan Roxas City sa diin gindeklarar nga dead-on-arrival sang gindangat sa ospital matapos nga nag-angkon sang patal nga pilas sa iya ulo.

Nagaguha sa imbestigasyon sang kapulisan nga nagapaliko na padulong sa Kapis Mansions ang Mitsubishi Montero SUV nga ginamaneho ni Adonis Brillantes y Daradar, 48-anyos ang pang-edaron sang Panit-an, Capiz sang ini ang nasanggit sang motorsiklo nga ginasakyan sang biktima.


Bangud sa kabaskugon sang pagkabunggo, nagtabog si Ricardo Villanueva sa ginasakyan nga motor kun sa diin naglampos ang ulo sini sa sementado nga karsada kabangdanan sang gilayon nga kamatayon.

Sa pagpakig-angot sang news team sa imbestigador nga si Police Staff Sgt Gamin Unarce, ginrelease sang kapulisan ang driver sang SUV matapos nga nahisugtan sang duha ka bahin nga i-settle na gid lamang ang natabo.

Samtang ang duha ka mga salakyan nga nag-angkon sang damage ang yara na sa subong na-impound sa Roxas City Police Station.



Facebook Comments