Jamindan, Capiz – Nagapadayon ang imbestigasyon sang mga kapulisan sa banwa sang Jamindan angut sa pagluthang sa isa ka persona sa Brgy Jaena Norte sa amu nga banwa sang nakaligad nga Huwebes sang gab-i.
Suno sa hepe sang Jamindan PNP nga si Police Captain Peter Jhon Pisueña, may yara na sila sang ginakabig nga “person of interest’ sa pagluthang sa biktima nga ginkilala kay Berlito Villasis Jr.
Ginpahayag sini dugang nga may yara na sila sang ginasunod nga motibo kag posible suspek sa krimen.
Madumdoman nga yara sa sulod sang iya poluy-an ang biktima sang ini ang ginsulod kag ginluthang sang suspek pasado alas siete sang gab-i.
Nag-angkon ang biktima sang duha ka mga pilas sa iya likod nga sa subong ang ginabulong sa isa ka pribado nga ospital.
Narekober sang mga kapulisan ang duha ka baseyo sang ginapahayag iya sang .45 caliber pistol samtang madasig nga nagpalagyo ang suspek sakay sa motorsiklo. Ini ang nakasuksok sang yellow nga jacket, itom nga helmet kag naka-camouflage.
Pagtimalos ang ginasunod sang kapulisan nga motibo sang krimen.
Samtang base sa impormasyon, ginluthang man sang wala pa makilala nga suspek ang duha ka mga alaga nga karabaw sang biktima.
