Judge Lacaya, gipusil didto sa Liloy, Patay!

Liloy, ZDN-Patay diha-diha si Judge Reymar Lacaya human kini gipusil sa wala mailang kriminal didto sa lungsod sa Liloy sakop ning probinsya sa Zamboanga del norte.

Matod pa anaa kini si Judge Lacaya sa gawas sa korte sa maong lungsod partikular sa may parking lot, apan kalit lang miduol ang usa ka kriminal ug sa walay pag duha-duha dali kining mipusil sa biktima ug maayong pagka igo niini sa ulo ug lawas nga maoy hinungdan sa iyang wala damhang kamatayon.

Si Judge Lacaya nakadestino kini sa Regional Trial Court Branch 28 Liloy, ZDN ug lumolopyo kini diri sa Barangay Turno, ning dakbayan sa Dipolog.


Tulo na ka bulan ang milabay human kini siya gibalhin gikan sa Branch 11, sa lungsod sa Sindangan.

Butyag pa sa hepe sa Liloy nga si Police Capt. Gregorio Bongolan, padulong na kini mo sakay sa iyang Toyota Hilux pickup si Judge Lacaya sa dihang gipusil kini.

Naghimo na karon ug makuti nga imbistigasyon ang kapulisan sa Liloy kalabot sa maong pagpamusil ug kun may kalambigitan ba kini sa iyang trabaho isip judge.

Pero gibutyag karon sa PNP liloy nga blanko pa sila tungod kay nag inusara lamang kini niadtong higayona ug walay CCTV camera ang maong korte.

Matod pa sa mga abogado dinhi sa Dipolog, posible nga wala kini kalambigitan sa pulitika tungod kay kining biktima wala ma’y gihawiran nga kasong may kalabutan sa eleksyon.

Si Judge Lacaya ang ikalima nga gipusil patay ilawom sa administrasyon ni Duterte.

Gikondena usab ni Chief Justice Lucas Bersamin ang pagkamatay ni Judge Lacaya kinsa ika 30 nga huwes nga gipatay sukad nagsilbi kini sa judiciary niadtong tuig 1999.

Hustisya karon ang singgit sa pamilya ni Judge Reymar Lacaya kalabot sa maong pagpamusil.

Facebook Comments