Junk shop sa Kauswagan, gipasirad-an sa syudad tungod sa mga kalapasan

113
photo credit- Antonio Resma Jr.- Cagayan de Oro City Philippines

 

USA ka junk shop ang gipasirad-an sa kagamhanan ning syudad tungod sa mga kalapasan sa balaod.

 

Sa kamandoan nga gipagawas ni Mayor Oscar Moreno pinasikad sa Executive Order No. 084, gipatuman sa mga otoridad adlaw’ng Miyerkules, Mayo 22 ang closure order batok sa Omega Junk Shop nga nahimutang sa dalan Restituto sa Capisnon, barangay Kauswagan ning syudad.


 

Ang nahisgutang junk shop nga nakarehistro sa tag-iya nga si Ms. Judith Omega ang matud pa nag-operate nga walay business permit sukad pa niadtong Pebrero 2017 subay sa records sa Business Permit and Licensing Office.

 

Nasuta usab sa aktuwal nga pagsusi sa Joint Inspection Team sa city hall nga nag-operate ang junk shop sulod sa residential zone nga supak sa balaod.

 

Ang ubang mga kalapasan niini mao ang kawad-on sa gate ug dili sirado, ug ang pag-okupar sa pedestrian sidewalk aron kabutangan sa ilang mga baligya o’ gamit nga nakahatag og peligro sa mga lumalabay.

 

Nahibaloan usab nga bisan pa man nga nakadawat na ang operator sa junk shop og pipila ka notice of violation gikan sa JIT nga gipangulohan ni Executive Overseer Atty. Jose Edgardo ‘Egay’ Uy, apan padayon gihapon kini sa pag-operate ug wala motuman sa nalatid nga mga regulasyon.

 

Giklaro sa kamandoan sa mayor nga magpabilin nga sirado ang maong junk shop hangtud sa panahon nga hingpit niining mapatuman ang hustong mga lagda ug regulasyon.

 

Gawas sa kapolisan ug mga sakop sa JIT, miabag sa pag-implementar sa closure order ang mga representante gikan sa City Administrator’s Office, City Task Force Demolition, City Treasurer’s Office, City Engineering, Roads and Traffic Administration, City Building Office ug City Legal Office.

Facebook Comments

From Advertisers