BACOLOD CITY – Ginbuno sang isa ka lalaki ang iya live-in partner kag ugangan matapos ini ginsaway sini gid lamang nga kaagahon sa Brgy. 30, Bacolod City.
Nakilala ang mga biktima nga sanday Liza Amar, 45 anyos ang edad kag bata niya nga si Krista Amar, 21 anyos, lunsay pumuluyo sang Purok Mainuswagon, Brgy. 30 sining ciudad sang Bacolod.
Suno sa mga biktima nga may natabo nga paglinalisay sa tunga nila kag sang suspek gani nagpamahug ini nga maglayas upod ang bata nila sang iyalive-in partner.
Bangud sini, ginsaway sang mga biktima ang suspek nga kon maglakat gid man ini, indi pagdal-on ang bata.
Apang nakibot na lamang sila sang nagkuha sang kutsilyo ang suspek kag ini sila ang ginpangbuno.
Ang ugangan sang suspek naka-angkon sang pilas sa iya likod samtang ang iya naman live-in partner ang may pilas sa iya wala nga siko.
Lunsay ginpangdala sa Corazon Locsin Montelibano Memorial Regional Hospital ang mga biktima samtang nakapalagyo naman ang suspek kag padayon karon ginapangita sang mga katapo sang Police Station 6./dyHB BACOLOD
