KADAMAY: Korapsyon magsugod sa gamay

22

Davao City – Wala magustuhi sa Kalipunan ng Damayang Mahihirap kun KADAMAY ang pamahayag ni Pres. Rodrigo Duterte nga puwede dawaton ang mga personahe ug mga opisyal sa gobyerno ang ihatag nga gasa gikan sa pribadong tawo o organisasyon.

Sumala ni KADAMAY Davao City Focal Person Toto Bulcan, nasayop si Duterte sa iyang gisulti nga okay lang mudawat og gasa gikan sa pribadong indibidwal o grupo ang mga empleyado sa kagamhanan sama sa nasudnong kapulisan or kasundaluhan.


Segun ni Bulcan, ang pagdawat og regalo sa pribadong sektor makunsiderang bribery sa mga trabahante sa gobyerno ug daku kining kalapasan sa Code of Conduct and Ethical Standards ug Anti-Graft & Corrupt Practices Act.

Sa anunsisyo ni Duterte, sama ra nga gidasig niini ang mga empleyado ug mga opisyal sa kagamhanan nga magpasuhol kun muhimo og binuang sa ilang katungdanan ug panarbaho.

Daw naglibog si Bulcan kun seryoso ba gayod ang kanhing Mayor sa dakbayan sa kampanya kontra kurapsiyon ug paglutos sa mga kurakot karon nga miyagyag kini nga walay problema kaniya nga mudawat og regalo kun gasa ang mga anaa sa gobyerno.

Gipahinumdoman sa KADAMAY Davao City si Duterte nga walay dinagku nga pagpangawkaw nga wala magsugod sa ginagmay sama sa regalo, busa angay ikinabuhi sa mga trabahante sa gobyerno ang ilang gipanumpaan nga serbisyong tinud-anay apan matinud-anong panerbisyo aron makabaton sila og kredibidad nga maoy yawe sa pagbalik sa pagsalig sa katawhan ngadto kanila.

RadyoMaN Joel Viray

Facebook Comments

From Advertisers