Kakulangon Sa Supply Sa Tubig Sa Barangay Kinilis Mas Nigrabe

GENSAN – MI-APILA na og tabang sa lokal nga panggamhanan sa lungsod sa Polomolok ang mga residenti sa upat ka mga Purok sa Barangay Kinilis, aron sila matabangan sa ilang nasinatian nga kakulang sa supply sa tubig mugna sa El Niño.Gibutyag sa mga residenti sa maong barangay nga apektado na ang ilang pang adlaw adlaw nga gimbuhaton tungod sa kakulangon sa tubig. Nasayran nga matag gabie sila nag sige og pulaw aron lang nga makasalod ug tubig. Samtang alas 2:00 ang takna sa kabuntagon magmata na ang mga residenti aron musalod subli og tubig.Sa adlaw dili kaayo mutobod ang gripo nga nakakonekta sa spring nga maoy nag inusarang source sa ilang tubig. dunay mga higayon nga sila magkuha pa ug tubig sa mismong spring tungod dili na makaabot pa sa ilang lugar ang supply tungod sa kahinay. Giangkon usab sa mga residenti nga sa usa ka simana makaduha o makatulong higayon nalang sila maligo aron makadaginot og tubig.Gibutyag ni Kinilis Kapitan Marina Tapay, nga wala man nag kuwang ang barangay og ang Lungsod sa paghatag og tabang ngadto sa mga residenti. Sa nakalabay, matag simana nagahatag og rasyon nga tubig ang Bureau of Fire Protection Polomolok ngadto sa mga residenti apan naundang human naguba ang fire truck. Nagsaad usab ang Municipal Disaster Risk Reduction and Management Council (MDRRMC) pinaagi ni Engr. Falabore nga higayon maayo ang fire truck subli silang magpadala og request ngadto sa BFP nga rasyonan og tubig ang lugar samtang nagpadayon ang nasinatiang tumang kainit. (INAH DAVEN DXMD RMN GENSAN)

Facebook Comments