Davao City – Padayong nagahimo karon og kampanya batok sa sakit nga dengue ang Davao City Health Office (CHO) sa mga tulunghaan sa elementarya ug komunidad sa syudad.
Sumala ni CHO Head Josephine Villafuerte, bag-uhay lang nila gipahigayon ang kampanya sa Bolton Elementary School ug karong bulana maglusad usab sila og education campaigns sa Bo. Pampanga, Agdao, SIR Talomo, Bago Aplaya, ug Cabantian, Buhangin subay sa pag obserba sa Dengue Awareness Month karong June 19, 2018.
Sa maong adlaw, adunay “ASEAN Dengue Day Activity” nga pagahimuon sa Crossing Bayabas Gym sa Crossing Bayabas, Toril gikan ala 1 sa hapon kutob alas 5 sa hapon.
Samtang gibutyag ni Elizabeth Banzon, Tropical Diseases Prevention Unit Head sa CHO nga mikunhod ang ihap sa kaso sa dengue sa syudad sa Davao ngadto sa 57% gikan Enero hangtod sa ikaduhang semana sa Hunyo ning tuiga kun itandi sa tuig 2017.
Matud ni Banzon nga sa ilang record, adunay 562 confirmed cases sa nasangpit nga period kun itandi sa tuig 2017 gikan Enero-Hunyo nga adunay natala nga 977 ka mga kaso.
Bisan pa man sa maong ihap, nagpahimangno gihapon ang CHO ngadto sa publiko nga dili magkumpyansa ilabi na nga nagsugod na ang tag-ulan diin sagad ginapondohan sa mga lamok ug ginaitlogan ang mga butang nga mabutangan og tubig nga posibleng magdala og sakit nga dengue.
RadyoMaN Renz Barbarona
