Davao City – Wala kapugngi sa mga membro KAPA Ministry International Tagum Branch ang ilahang mga emosyon atol sa operasyon sa mga awtoridad kagahapong adlawa, June 10, 2019.
Kanya-kanyang emosyun sa mga membro ug usa ka babaye ang pirteng tiyabaw human makita ang mga maletang gipangsudlan sa mga nakumpiskang paraphernalias sulod sa maong opisina nga gisakay sa truck sa mga operatiba.
Atol sa interbyu sa RMN Davao sa usa ka membro nga nasakitan matud pa kini sa mga panghitabo tungod kay dako ang natabang sa KAPA sa pagpaeskwela sa iyahang mga anak.
“Nasakitan mi tungod ani amoang pag-donate nakapaeskwela mi sa amoang mga anak, nahatagan namo og panahon amoang pamilya nga makauban,” sumala sa maong membro
Nanawagan kini kang Presidente Rodrigo Duterte mga paminawon ang ilahang kabahin ug dili ipasara ang KAPA.
“Ang gusto lang nako sa gobyerno nga patas lang. Kung mahimo lang unta tan-awon ang sitwasyon kay katungod man nila nga anaa sa gobyerno nga mususi pero dili lang pod kay usa ra ka tao ang tan-awon. Makita man ninyo ang sitwasyon sa KAPA wala man miy gipanglupigan. Hangyo lang namo sa Presidente nga pamation pod ang tingog sa masa ba,” matud niini.
Gipasabot ni KAPA Tagum Evangelist Robert Melendez ngadto sa mga membro nga anaa sa gawas sa opisina sa KAPA ang gipahigayong operasyon sa NBI.
“Sumala sa nakabutang sa ilahang warrant kanang volumonious certificate, any gadgets nga pweding magamit silbing ebidensya didto unya sa korte. Dili na mga kwarta, mga gamit na ang uban ana printer ang uban photocopier, klaro-klaro na ha,” matud ni Melendez
Gitin-aw niini nga wala gisirado sa NBI ang Kapa.
“Basin masipyat mo, dili tumong sa NBI nga ipasara ang KAPA kay dili mana nila trabaho. Ang trabaho nila diria ilahang gituman nga mag-conduct og search operation,” sumala ni Melendez.
RadyoMaN Aimee Guinita
