Pagadian City – Miabot sa 30 ka mga balay ang naugdaw atol sa sunog nga miulbo sa Purok Sweet Love ug Purok Kahayag sakop sa Barangay Dumagoc, ning syudad sa Pagadian.
Matud pa ni City Fire Marshall Edgar Quitoy dihang nahinabi sa RMN Pagadian nga ilang nadawat ang alarma sa sunog alas 5:57 sa hapon pinaagi pagtaho ni Mr. Miguel Glinogo.
Gidugang pa ni Quitoy nga nagsugod ang sunog sa gipuy-an ni Pacita Navies ug dali nga nikatag sa silingan nga mga balay nga sagad hinimo sa light materials.
Naglisod ang kabomberohan sa pagtabang sa maong sunog gumikan sa kapiot sa lugar nga gilarayan sa mga tulunghaan og nakontrolar ang sunog alas 7:15 na sa gabii.
Dunay impormasyon nga nadawat ang kabomberohan nga nilung-ag nga gibyaan ang hinungdan sa sunog.
Gisuta pa ang kantidad sa danyos sa maong sunog nga gisaka hangtod sa ikalimang alarma. Wala’y natala nga namatay o naangol atol sa hitabo.
