Kaso it dengue sa Aklan nagtaas it 47% – PHO

15

Kalibo, Aklan – Nagtaas makaron it 47% rong kaso it dengue sa probinsya it Aklan kumpara ko nagtaliwan nga dag-on base man sa rekord it Provincial Health Office (PHO) Aklan.
Suno kay Dr. Cornelio “Bong” Cuachon Jr., Provincial Health Officer 1 nga umpisa ko Enero 1 hasta Mayo 25 makaron nga dag-on hay naka rekord sanda it 982 ka kaso nga mas mataas raya kumpara ko nagtaliwan nga dag-on sa kaparehong period nga may una eamang nga 665 ka kaso.
Naka rekord man sanda it 9 ka mga namatay bangud sa komplikasyon kung sa siin mataas man raya kumpara ko nagtaliwan nga dag-on sa kaparehong period nga may una eamang nga 7 ro narekord.
Ro mga banwa suno kay Cuachon nga may namatay bangud sa dengue hay ro banwa it Balete, Tangalan, Kalibo, Malay, New Washington ag Numancia.
Samtang sa 982 ka kaso ngara hay 375 rong naga edad 1 year old hasta 10 year old rong apektado ukon 39% sa bilog nga kaso sa probinsya it Aklan ag 304 mat-a rong 11 year old to 20 year old rong apektado.
Sa makaron nga dag-on rong buean it Pebrero man rong may maabo nga kaso ro narekord nga nag-abot sa 280.
Sa gihapon nagapadumdom ro aton nga Provincial Health Office (PHO) ag Department of Health (DOH) nga pasanyugon gihapon naton ro pagpatigayon it 4S nga buot hambaeon hay (Search and Destroy) usuyon ag samaron ro mga gina pugaran ag gina itlogan it namok; (Self-protection) protektahan ro atong sarili sa namok; (Seek early consultation) magpatan-aw sa doctor kon may mapan-uhan nga sintomas it dengue; (Say ‘no’ to indiscriminate fogging) ukon indi basta-basta maghimo it fogging.
Sa makaron hay may mga ginatao man rong PHO-Aklan nga larvicides para sa mga lugar nga may maabong kiti-kiti para nga mapatay ag indi eon mag-abo pa.

Facebook Comments

From Advertisers