Kaso nga kidnapping ginahanda batuk sa babayi nga nagkuha bata sang iban

29

BACOLOD CITY. Ginapreparar na sang Police Station 1 ang tanan nga mga papeles agud gilayon nga mapasaka ang kaso nga kidnapping batuk sa babayi nga nagkuha sang bata sang isa ka 24-anyos nga iloy sadtong Lunes, November 11 apesar pa nga ini ang nabalik na sa ila.

Suno sa hepe sang Police Station, Police Major Jovil Sedel nga ini matapos nga ila nakuhaan sang affidavit si Mary Grace Goto, residente sang Had. Teresita, Brgy. Granada, Bacolod City, iloy sang 2-week old nga lapsag nga lalaki nga ginkuha sang suspek nga si Angelie Gonzales


Ginpahayag ni Sedel nga ginapaabot nila nga makumpleto na sini nga adlaw ang mga dokumento kag gilayon nila iga-file sini man nga adlaw ang kaso nga kidnapping batuk sa suspek.

Madumduman nga sadtong Lunes nagahilibion nga nagpangayo sang bulig si Mary Grace matapos gindala ni Angelie ang iya lapsag matapos sang ila pagkilal-anay sa regional hospital.

Apang sang Martes, ginbalik sang utod ni Angelie ang lapsag kag nagpangayo sila sang pasensya sa nahimo sang ila utod nga karon indi na nila makita.

Ginapanindugan ni Mary Grace nga magapasaka gid sila sang kaso kag iya gina-demanda nga si Angelie mismo ang mag-atubang sa iya kag indi ang iya mga utod agud personal niya ini nga masugilanon kag mahibaluan ang rason kon ngaa iya ginkuha ang bata.

Facebook Comments

From Advertisers