Roxas City, Capiz- Patay ang isa ka katapo sang militar samtang duha ang pilason sa engkwentro kontra sa mga membro sang New Peoples Army(NP) sa syudad sang Himamaylan.
Nagluntad ang engkwentro mga alas 2 sang hapon sa Sitio Buyoron,Brgy. Buenavista, Himamaylan City kun sa diin napilasan kag patay si Pfc Joel Farinas nga taga- Dumalag Capiz samtang pilason man ang duha ka upod sini nga nakilala kanday Sgt Tosalem kag Cpl Porten.
Ang mga ini ang lunsay katapo sang 62nd Infantry Battalion sang Philippine Army.
Suno sa report, nakabaton sang impormasyon ang militar nga may yara sang presensya sang mga armado nga kalalakinhan sa lugar kabangdanan nga nagpatigayon ang mga ini sang pagpatrolya.
Nagdugay sang 10 ka minutos ang baylohanay sang lupok sa tunga sang militar kag rebelde nga grupo nga ginabanta nagalab-ot sa 20 ka bilog.
Samtang wala naman nadeterminar kun may napatay ukon napilasan sa bahin sang mga rebelde.
