Sinalubong ng mga kalahok sa Bird Watching Caravan sa Pangasinan ang katahimikan ng umaga na tanging huni ng mga ibon at pagbuntong-hininga ng hangin ang maririnig.
Ang programa ay inilunsad ng Department of Tourism – Region 1 upang isulong ang makakalikasang turismo sa rehiyon.
Pinangunahan ng mga bird enthusiasts at nature lovers mula sa iba’t ibang panig ng bansa, ginanap ang caravan sa piling bayan ng Pangasinan, kabilang ang Bangrin Marine Protected Area sa Bani, isang kilalang sanctuary ng 122 uri ng ibon—migratory man o indigenous.
Bitbit ang kanilang mga binoculars at camera, masigasig nilang pinagmamasdan ang makukulay na pakpak, kakaibang kilos, at mapang-akit na huni ng mga ibon sa natural nilang tahanan. Sa bawat klik ng kamera, tila ba isang sandaling sining ang nahuhuli—mga kwento ng kalikasan na hindi nabibigyang pansin sa araw-araw.
Hindi lamang sa Bani naganap ang bird watching. Kasama rin sa itinerary ang mga bird sites sa Mangatarem at Balungao, na parehong mayaman din sa biodiversity at tanawing kahali-halina. Pinagsama ng caravan ang pagmamahal sa kalikasan at ang sigla ng paglalakbay—isang bagong mukha ng turismo na hindi lamang para sa kasiyahan, kundi para rin sa kamalayan.
Layunin ng proyektong ito na hindi lamang hikayatin ang mga lokal at banyagang turista na tuklasin ang ganda ng Region 1, kundi upang itaguyod ang pangangalaga sa kalikasan sa pamamagitan ng ecotourism activities gaya ng bird watching at hiking.
Ang Bird Watching Caravan ay patunay na ang turismo ay hindi laging tungkol sa mataong lugar at marangyang bakasyon—minsan, sapat na ang simpleng pag-upo sa ilalim ng punongkahoy, pagtingala sa kalangitan, at paghanga sa kagandahan ng mga nilalang na lumilipad sa kalangitan. | 𝙞𝙛𝙢𝙣𝙚𝙬𝙨
