Roxas City, Capiz- Yara na nakahunong sa karsel sang Roxas City PNP ang ginatudlo nga suspek nga nagpangawat sang mga baligya nga ukay-ukay sa Barangay 5, Roxas City. Ginkilala ang suspek sa kay Renelet Daban Avelino, sang nasambit man nga lugar.
Ginpahayag sang biktima nga si Maria Junet Pernito, 30 anyos nga pinaagi sa iya inventory nadiskubrehan sini nga kulang ang ila mga baligya. Nakit-an man sini nga puwersahan nga ginwasak ang dingding sang iya baligyaan kag didto ginpaagi ang mga ginpangkawat nga ukay-ukay.
Gilayon nga ginsugid sang biktima sa Roxas City PNP ang nagluntad nga pagpangawat sang iya mga baligya. Base sa maid-id nga imbestigasyon sang mga otoridad, nakilala ang suspek. Kalakip sa mga narekober sa follow operation sang kapulisan ang mga sapatos, mga fancy nga alahas, gadgets kag madamo pa nga iban. Suno sa biktima, ini tanan ang nagabalor sang P43, 000.
(photo from web)
