General Santos City—gikatakdang pasakaan ug kasong robbery karong adlawa ang duha ka mga kawatan nga naaktohang nangawat sa balay nga nahimotang sa G-Mesa St. Barangay Lagao ning syudad alas 3:30 ang takna sa kaadlawon kagahapong adlawa.
Ang mga suspect ang giila nga silang Alvin Remulta Barda, 20 anyos ug lumulopyo sa Purok 21, Barangay Fatima ning syudad nga kanhi na usab nasikop sa kasong pag pangawat ug nabuhian lang tungod kay minor edad pa kini kaniadto ug ang kauban niini nga si Fausto Luder, 18, lumulopyu Purok Diamond, Purok 1 Brgy. Tambler.
Sumala pa sa imbistigasyon sa kapulisan nga naaktohan ang mga nasangpit nga anaa sulod sa lawak sa mga biktima kung diin pugsanon kini nga misulod nilang Welnard Cabca Rato ug Abubakar Mamaki hinungdan nga dali nga mitawag ug pulis.
Sa kasamtngan nagtingkagol ang suspect sa selda sa Police Station 3 ug gina andam na ang kaso nga ipasang-at batok ngadto sa mga nahisgutan.
