Kinawat nga single motor, narekober

Dipolog City – Narekober sa kapolisan ang usa ka single motor nga gikatahong gikawat sa wa hiilhing kawatan sa niaging kadlawon, samtang nakaparking gawas sa usa ka boardinghouse diha sa Tomas Claudio St. barangay Miputak, dakbayan sa Dipolog.

Si PO1 Nelvin Mangan imbestigador sa kaso nibutyag sa interbiyo sa rmn dxdr, nga ang single motor honda wave 100 kolor pula ug itom kombinasyon plaka numero JO 7408 nga gipanag-iya ni Ryan Polestico, 21 anyos nga taga lungsod sa Sergio Osmeña, narekober kini didto sa barangay Bag-ong Argao lungsod sa Molave Zamboanga del Sur.

Sumala pa ni PO1 Mangan human nga gipablater sa tag-iya ang panghitabo dali nilang gialerto sa kasikbit nga police station ang maong motor.


Ang Molave Municipal Police Station pinaagi sa hepe nga si PSI Herminigildo Bajao, nakigkutay sa Dipolog PNP dihang nasigpatan ang maong motor nga gibayaan sa wa hiilhing kawatan nga sumala pa naplatan ang ligid ug nahutdan sab sa gasolina.

Dugang pa ni PO1 Mangan nga anaa na silay identity sa suspek sa maong pagpangawat sa single motor kinsa padayon pa nga gipanid-an ang gilunggaan niini.

Sa karon nabalik na ang maong motor ngadto tag-iya nga si Polestico. (r.m)

Facebook Comments