Ginakabig na lang ni Councilor Israel Salanga nga parte sang “learning process” ang wala nadayon nga paggamit sang Luxe Residences sa Purok Acacia, Gatuslao St., Brgy. 15, matapos nga ginbalabagan ini sang mga barangay officials partikular ni Punong Barangay Anjo Ayco.
Sa interview sang DYHB kay Salanga, head sang Action Team on Returning OFWs (ATRO), ginpahayag sini nga nahangpan niya ang concerns sang mga opisyal sang Brgy. 15 sa diin ila ginpahayag nga delikado nga himuon nga quarantine facility ang Luxe Residences bangud nahamtang ini sa downtown area kag malapit sa madamo nga tawo.
Madumduman nga gina-reklamo man sang barangay officials sang Brgy. 15 nga wala sang nagakaigo nga koordinasyon sa plano nga himuon nga quarantine facility ang amo nga building.
Ginpahayag ni Salanga nga sa karun nga tinion, nagapangapa ang tanan bangud wala ginalauman ang pag-abot sang COVID-19 kag sa ila pagtinguha nga ma-accommodate ang mga returning OFWs, may yara man sila sang mga kakulangan. Gindugang pa sini nga parte sang pagtuon ang paglantaw sang tanan nga aspeto sa mga desisyon.
Wala naman ini sang plano nga klaruhon ang iya ngalan sa thread sa social media sa diin siya ang na-mention ni Kapitan Ayco tuhoy sa plano sa Luxe Residences, bangud suno sa iya involved man ang tanan nga opisyal sa mga plano para sa mga returning OFWs.
Ini bisan pa nga si Councilor REnecito Novero ang in-charge sa pagpangita sang mga hotels nga tiniran sang mga OFWs upod sa Overseas Workers and Welfare Administration (OWWA).
[image: image.png]
