Roxas City, Capiz- Ginkakas na sa iya posisyon bilang administrative officer sang Capiz Rehabilitation Center ang kontrobersyal nga si Mr. Andreo Llaver makaligad ang ginpatigayon nga hinun-anon sa tunga sang pamunoan sang CRC kag grupo sang mga inmates matapos nga nagpatigayon ang mga ini sang noise barrage agud ipanawagan ang pagpahalin kay Llaver bangud sa pila ka mga alegasyon.
Kalakip sa mga ginpalab-ot nga reklamo sang mga ini kontra kay Llaver amu ang ginahimu sini nga pag-diskarte sa mga nagabisita nga asawa ukon live-in-partner sang pila ka inmates samtang may yara man sang alegasyon nga may napabusong pa ini.
May impormasyon man nga ginapangayuan niya sang contact number ang pila ka mga asawa sang inmates kag kun indi ang mga ini maghatag, iya pa nga ginapahog nga gipiton ang asawa nga yara sa sulod sang CRC.
Samtang, ginkumpirmar ni Provincial Administrator Edwin Chinel Monares, nga igasaylo anay sa iban nga talatapan si Llaver samtang nagapadayon ang imbestigasyon.
Samtang basi sa inisyal nga negosasyon sa tunga sang pamunoan sang CRC kag mga lider sang selda, nahisugtan nga pahamtangan sang duha ka telepono nga amu ang gamiton sang mga inmates agud mag-contact sa ila mga himata.
Samtang, napadulongan naman sang Provincial Engineers Office kag Provincial General Services Office ang CRC agud nga inspeksyunon ang mga atop para sa nagakaigu nga repair.
