*General Santos City— Miubos ang kriminalidad sa dakbayan sa unang bulan ning tuig 2019 kung itandi sa unang bulan milabay’ng tuig 2018. Kini ang gibutyag ni Police Senior Superintendent Raul Supiter, City Director sa Gensan City Police Office.*
*Sumala niya nga base sa datus, miubos ang index crime kon krimen nga hinimuan sa mga kriminal sama sa pagpatay ug uban pa, apan mitaas ang non-index crime kung asa kini ang mg police initiated crime sama sa mga operasyon batok illegal nga droga ug illegal nga sugal.*
*Pama-tuod matud pa kini nga mayo ang dagan sa ilahang kampanya batok droga ug sugal sa dakbayan.*
*Dugang pamahayag ni PSSupt. Supiter nga dako ang nahimong tabang sa gi-muntar nga mas gipahugtan nga checkpoint sa mga pasulod ug pagawas sa Gensan sa pag-ubos sa kriminalidad.*
*Gidayeg man usab niini ang kontribusyon sa militar sa pagbantay sa siguridad sa dakbayan gumikan dako matud pa ang ilahang tabang aron nga mapabilin ang kalinaw sa dakbayan.*
*Gani gawas sa mga checkpoint sa kapulisan, aduna usab mga CCTV cameras ug base radio nga gipangbutang sa mga checkpoint area sa militar.*
