Krimen ug Seguridad

19

Davao City – Sa tuig 2018, miulbo ang dagkung mga panghitabo ug krimen dinhi sa siyudad sa Davao ingon man sa ubang dapit sa nasud nga naghatud ug tumang kahadlok ug kabalaka diha sa dughan sa mga Dabawenyo gumikan sa hisgutanang seguridad.

Natay-og ang kampanteng kinabuhi sa mga Dabawenyo sa dihang sunod-sunod nga nadiskubrehan ang mga ‘chop-chop victims’ sa dakbayan kansang mga biktima pulos babaye kinsa wala pa mailhi hangtud karon.

5:45 sa buntag Hulyo 29, 2018, nakaplagan sa CENRO garbage collector nga si Ranel Pana ang plastic bag diin ang unod putol-putol nga lawas sa babaye….

Nag-gintang lamang og pipila ka semana, subli na usab gi-uyog ang mga Dabawenyo sa laing gi-‘chop-chop’ nga babaye nga gisulod sa black garbage cellophane ug gilabay didto sa sanitary landfill sa Carmen, Tugbok District.

Ang kapulisan sa siyudad blanko sa motibo, pagkatawo sa mga biktima ug ang mastermind sa mangilngig nga krimen…

Gikunsidera usab nga ngilngig nga panghitabo ang paglugos- patay sa usa ka dalagita kansang suspek mao si James Narte.

Si Narte napatay sa kapulisan human giingong nangilog og armas sulod mismo sa presinto sa kapulisan…

Dili usab ti-aw ang gidangatan sa laing sais anyos nga batang babaye kay gilugos, gisunog ug gipatay kini diin ang biktima unang gideklarang ‘missing’ sa pamilya niadtong buwan sa Oktubre.

Ang suspek silingan ra usab sa biktima sa Matina Pangi nga mao si Rico Jay Labao, 27 anyos, construction worker kinsa napatay gihapon sa pulis human nangabig og pusil sulod sa selda sa Talomo PNP.

Sa laing bahin, gi-masaker sa 40 ka mga armado ang siyam ka sakop sa National Federation of Sugar Workers samtang nangatulog lamang sa Hacienda Nene sa Barangay Bulanon, Salay, Negros Occidental 10:00 sa kagabhi-on niadtong Oktubre 20, 2018.

Ang kapulisan ug ang CPP-NPA-NDFP ingon man mga militante nag-iyahay ug akusar sa matag usa sa maong krimen, diin nilutaw usab ang scenario nga mga rebelde ra usab ang naghunos sa kinabuhi sa mga biktima aron guboton ang Duterte administration subay sa Oplan Red October Oust Duterte plot pinaagi sa pagpahid sa kargo de konsyensya ngadto sa mga awtoridad….

Sa laing bahin, gidisturbo usab ang kahapsay ug kalinaw sa Mindanao gumikan sa duha ka mga insidente sa pagpamomba sa Isulan, Sultan Kudarat nga mi-angol og daghang kinabuhi niadtong buwan sa Agosto.

Sakop sa teroristang grupo ang gitudlo sa pagpamomba diin napatay sa gilusad nga retaliatory military operation ang usa sa mga suspek nga si Norodin Talib natigayon kini sa Sitio Lab, Barangay Kaloy, lungsod sa Isulan…

Usa usab ka dakung krimen sa Pilipinas ning tuiga nga ni-apektar sa atong seguridad mao ang pagpusil-patay kang Ako Bicol Partylist Representative Rodel Batocabe uban ang police escort niini samtang nanghatag sila og regalo sa lungsod sa Daraga, Albay….

Una pa niana, gibugha usab sa wa pa mailhing mamumuno si Tanuan Mayor Antonio Halili samtang nitambong lamang sa regular weekly flag-raising activity niadtong tungora.

Si Halili na-link sa illegal drug trade gani gihukasan kini sa ‘supervisory powers’ nganha sa local police sa iyang area niadtong 2017. Siya maoy ika-siyam nga local executive nga napatay sa latest tally….

Sa natad sa gyera kontra insurhensiya, ang padayong pagpangatake sa CPP-NPA-NDFP batok sa pwersang militar ug kapulisan, rebel recruitment, extortion, pagpatay sa mga tribal leaders ug mga inosente maoy giilang nagtukmod kang Pres. Rodrigo Duterte aron tuldokan na sa hingpit ang talandugon ug pausab-usab nga prospects kun tsansa sa peacetalks….

Usab ang padayon nga terorismong binuhatan sa ISIS-inspired Maute Group ug fundamentalist Dawlah-Islamiyah ug presensya sa mga komunista ug mga insidenteng kriminalidad maoy nagsilbing dakung rason aron hugtanong ipamursigi sa Duterte regime ang pagpatuman sa usaka extended ug expanded martial law sa Mindanao kutob pa sa hinapos nga parte ning tuiga 2019 aron salbaron ang atong demokrasya gikan sa kamot sa mga buot mohasi niini.

RadyoMan Joel Viray

Facebook Comments