Kwidaw ‘ta sa campaign promises

19

Davao City – Karon nga magsugod na ang kampanya alang sa mga magpapili sa pagka-Senador ug sa mga Partylist Representatives, mao na kini ang tukmang panahon aron bukiki-on og maayo sa mga botante ang plataporma ug saad nga ilatag sa mga kandidato alang sa national positions.

Gidasig ni Sentro Labor for Global Chairman Joshua Mata ang katawhan nga dili dayon motoo sa iyawyaw sa mga kandidato inay sayron una kung unsa sila ka sinsero sa pagtuman sa ilang gipangsaad kay basin mahulog ra gihapon nga makalulu-oy ang tanan nga maoy nasinati sa mga tawo sulod na sa pila ka dekada.


Segun ni Mata, taas nang panahon nga giilad sa mga politiko ang mga botante sa matag kampanya apan karon, oras na aron kuti-kutihon og maayo ang mga kandidato sa ilang mga saad una pa man sila hingpit piyalan sa boto karong Mayo 13, 2019 aron dili magmahay sa kaulahian.

Gisaway ni Mata si Pres. Rodrigo Duterte gumikan sa kapakyas sa pagtuman sa iyang mga saad sa kampanya nga humanon ang contractualization ug tuldokan ang droga sulod sa unom ka bulan apan kapin tulo na ka tuig sa gahum ang kanhi mayor wala gihapon natuman ang mga pasalig.

Wala usab gilingkawas sa batikos ni Mata ang mga pambatong kandidato sa administrasyong Duterte nga pulos mga ‘traditional politicians’ kun trapo nga sa matag kampanya hastang daghana og pasalig apan kung makadaug na mahikalimot na sa mga saad.

Gi-awhag ni Mata ang mga botante nga dili ibaylo sa salapi sa mga kandidato ang ilang sagrado nga boto kay mao ra kini ang maghatud sa maayong kaugmaon sa nasud ug sa sunod pa nga henerasyon ug pilion ang mga politiko nga sa tan-aw nila angayan gayud nga tugahan sa gahum.

RadyoMaN Joel Viray

Facebook Comments

From Advertisers