PONTEVEDRA, CAPIZ- Nag-angkon sang mga kapilasan sa ulo kag abaga ang 51-anyos nga lalaki matapos ini ang gingubat kag ginlabo samtang manugtulog na sa ila poluy-an alas otso sang gab-e sa Brgy Yatingan, Pontevedra, Capiz.
Ginkilala ang biktima kay Antonio Batuigas nga sa subong ang ginabulong sa isa ka ospital sa syudad sang Roxas samtang nakatigayon man ini nga makabalos sang labo sa suspek nga Ronald Cullos y Andrada nga napilasan man.
Sa subong yara sa Bailan District Hospital ang suspek kag natalana nga iga-transfer sa isa ka ospital sa syudad sang Iloilo.
Nahibaloan nga nakainom sang makahulobog nga ilimnon ang suspek sang gingubat sini ang biktima.
Base sa inisyal nga imbestigasyon sang kapulisan, manugtulog na ang biktima sang ini ang gingubat sang suspek kag ginlabo apang nakakuha sang tsansa si Antonio Batuigas paagi sa paglabo sa suspek.
Ang daan nga indi paghangpanay ang ginatudlo kabangdanan sang insidente.
