Ipahigayon sugod karong adlaw sa mga progresibong grupo ang Bukidnon Lakbayan 2019.
Sa interview sa RMN Malaybalay ngadto kang Wilboy Lay-on ang Bukidnon Chairman sa Movement Against Tyranny (MAT) gibutyag niini nga ang mao nga kalihukan gipangunahan sa MAT ug grupong Hustisya.
Makigduyog matud pa niini ang mga progresibong organisasyon sama sa Organisasyon sa Mag-uuma nga KASAMA Bukidnon, Mamumuo nga OGYON, Kabatan-onan ug istudyante nga Anak Bayan, Kasilo, Pigyayungaan, ug Kadamay.
Magsugod ang mao nga Lakbayan sa lungsod sa Maramag pinaagi sa usa ka programa kon diin nagpasibaw sa ilang tumong.
Gibana-banang muabot sa 10 hangtod 13 ka adlaw ang ilang lakbayan nga mahuman sa Cagayan de Oro City.
Usa sa panawagan sa mao nga grupo ang pagpahunong sa martial law.
Samtang sa interview sa RMN Malaybalay ngadto kang Cpt. Reggie Go, ang Division Public Affairs Office Chief sa 4th ID, gibutyag niini nga ang maong mga grupo walay nakitang mga maayo ug pulos lamang negatibo ang nakita sa administrasyong Duterte.
Gihagit usab ni Go ang maong mga grupo nga ayha maglihok protesta ug mag-lakbayan mas maayo ug muduyog na lamang karong adlaw sa mga kalihukan nga himoon sa kasundaluhan alayon sa ika-77 nga Araw ng Kagitingan.
Gipanawagan usab ni Cpt. Go sa publiko handumon ang Araw ng Kagitingan pinaagi sa paghatag ug respito sa mga beterano nga nagsakripisyo para makab-ot ang kalinaw ug kalambuan.
Tema niini karong tuiga mao ang “Sakripisyo ng Beterano ay Gunitain, Gawing Tanglaw ng Kabataan Tungo sa Kaunlaran”.
