General Santos City–Kasuko ang gibati karon sa pamilya sa biktimang si Jonathan Paos, 30 anyos nga taga Barangay San Jose, Gensan kansa biktima sa pagpangulata patay sa iyang bayaw alas 10:00 ang takna, Byernes sa Gabie didto sa may Barangay Bawing Gensan.
Sumala ni Ruel Paos, Igsuon sa biktima nga igo rang mibisita sa balay sa ilang bayaw nga si Edlan Bantilan ang biktima. nag inum matud pa ang mga nasampit ug dihang nahubog, didto na gikulata ug maayo sa suspek ang biktima nga hinungdan sa iyang kamatayon. Paspas nga misibat ang suspek human sa insidenti.
Aminado si Ruel nga ila usab gikakurat ang gihimo sa ilang bayaw ngadto sa ilang igsuon.
Sumala pa nga wala man silay nasayran nga nagbingkil ang mga nasampit ayha nahitabo ang pagpangulata sa suspek sa biktima. Dako ang pagtuo ni Ruel nga posibling bingkil lang gyud sa inum ang hinungdan sa pagpatay sa suspek ngadto sa iyang igsuon.
Samtang gikumperma usab ni Ruel nga walay balatian ang iyang manghod, posibling napuruhan gyud ang biktima dihang siya gikulata sa suspek.
Giklaro ni Ruel nga wala silay planong pasakaan ug kaso ang suspetadong si bantilan. Ilang hangyo lang nga unta sila tabangan sa suspek sa pagpalubong sa biktima.
Aminado hinuon si Ruel nga posibling malahi na nag ilang pagtagad sa iyang bayaw tungod sa iyang nahimo sa iyang manghod apan ilang paningkamutan nga mapasaylo dayon ang nahisgutan.
