Lalaki, ginhostage an iya ex live-in partner

TACLOBAN CITY – Imbis nga nag-iistorya la an mag-anay live partner, nagresulta lugod ini hin hostage taking.

 

Ginkilala an biktima nga hi Maria Victoria Canotan Sia, 28 anyos, usa nga Sales consultant ngan residente ha Brgy 99, Diit han Tacloban.

 

Ginkilala liwat an suspek nga iya anay live-in partner nga hi Maximillan Augusto Montayre, residente ha Brgy. 99 Mercyville, Diit han Tacloban.


 

Ha imbistigasyon han mga otoridad, kumadto an lalaki nga suspek ha opisina ni Sia para makipag-istorya nga wad-on na unta iton Barangay Protection Order kan Sia pero nadiri hi sia kay ginkikinastigo daw hiya hiton iya anay nga live-in partner.

 

Han mapaso na an ira konprontasyon, bumunot hin caliber 38 nga pusil nga may sulod nga 12 nga bala an suspek rason han kahikalasi ngan pag-singgiyait han biktima.

 

Sumala kan PCInsp. Elmer Jabinar, Tacloban PNP station 2 commander, ginpukpok han suspek an ulo ni Sia gamit an iya pusil rason han pagdugo han ulo hini.

 

Gintutukan pa hin pusil han suspek an katrabaho ni Sia. Umabot an mga kapulisan pero waray magpa-alangtad an suspek, masurrender daw la hiya kun an iya employer nga hi Michael Espinosa iton magkumbinser ha iya.

 

Dayon naman nga umabot hi Espinosa ngan didto na iginduhol han suspek an iya pusil ngan summurender.

 

Aatubangon han suspek an kaangayan nga kaso ngan paslak na hiya ha Police Station 2 han Tacloban.

Facebook Comments