Lalaki gitigbas sa kainom nga silingan-patay, suspek arestado

102

Davao City – Kasong murder ang atubangon sa usa ka lalaki human niini gitigbas-patay ang iyang kainom nahitabo alas-7 sa gabii niadtong Huwebes (September 23, 2021) sa Purok 1, Andap, Laak, Davao de Oro.

Sa interbyu sa DXDC RMN Davao sa Laak Municipal Police Station (MPS) naila ang biktima nga mao si Charl Angelia, 31-anyos, minyo, residente Purok 1, Barangay Andap, Laak, Davao de Oro ug ang suspek mao ang silingan ug mismong kainom niini nga si Roy Alijojo, 43-anyos, mag-uuma, residente sa susamang lugar.


Gisaysay ni Lieutenant Colonel Jerry Cabag, Chief of Police (COP) sa Laak MPS sa nga samtang nag-inom ang duha sa balay sa ila usab nga silingan, kalit na lamang silang naglalis ug miresulta sa pagkuha og sundang sa suspek dayon tigbas sa biktima diin naigo kini sa liog nga bahin.

Matud ni Cabag nga subay inbestigasyon, aduna nay kahi bangi ang duha ayha nahitabo ang krimen. Human sa insidente, nadala pa sa balay tambalanan ang biktima apan gideklara na kining dead on arrival.

“Ang suspek ug atoang biktima nagkuyog lang sila og inom. Unya naa silay heated argument kay kabalo na ka sa espirito sa alak, naglalis sila. Unya, mao ‘to ang suspek, nikuha og sundang gikalit niya og tigbas ‘tong biktima nga iyaha ra pong kainom,” saysay sa pulis.

Gilayon usab nga naaresto ang suspek ug pormal nga napasakahan og kaso kagahapong adlawa (September 24, 2021).



Panawagan sa otoridad nga istoryahan ang mga bangi o wala pagsinabtanay aron nga kini masolusyonan ug dili musangko sa madugo nga krimen.

RadyoMaN Kirby Manzon


Facebook Comments