BACOLOD CITY – Nabiktima sang shooting incident ang isa ka security guard kag isa ka lalaki may mga las 7:30 sini gid lamang nga aga sa Firmville Subd., Brgy. Pahanocoy, Bacolod City.
Nakilala ang mga biktima nga sanday Enriquito Andong (guwardiya), 48 anyos, kasado kag pumuluyo sang Sitio Canonoy, Brgy. Miranda, banwa sang Hinigaran kag si Manuel del Rosario, 41 anyos, residente sang Brgy. Pahanocoy, Bacolod City.
Suno sa imbestigasyon sang police, naglalisay ang duha kag sang naga-init na ang ila pagbayluhanay sang tinaga tubtub nga ini sila ang nagsumbaganay.
Matapos sini, gin-alegar nga gin-agaw ni Del Rosario ang service firearm sang gwardiya apang ini ang aksidente nga naglupok.
Narecover sa scene of the crime ang 2 ka empty cartridge sang 9 mm kag isa ka armas nga Rock Island.
Lunsay nag-angkon sang pilas tuga sang igo sang bala sa ila lawas ang gwardiya kag ang amo nga lalaki kag padayon karon ginabulong sa Bacolod South Hospital./dyHB BACOLOD
