LALAKI NAG-AMOK KAG NAGPANGLABO | Apat ka mga persona lakip ang suspek, patay samtang duha kritikal sa hacking incident sa banwa sang Panay!

2727

Panay, Capiz- Apat ka mga persona ang patay samtang tatlo ang kritikal kag padayon nga ginabulong sa ospital sa nagluntad nga hacking incident sa Tanza Dulonan, Panay, Capiz alas 3:46 sang hapon.
Gindeklarar nga dead-on-arrival sang gindangat sa Health Centrum Hospital ang mga biktima nga ginkilala kanday Concepcion Celino y Baniel,70-anyos; Ramilyn Labto y Celino, 36-anyos kag Jaira Isabel Labto y Celino, apat ka tuig ang pang-edaron.
Patay man ang ginapahayag suspek nga si Nestor Beldia y Acuyong sang nasambitan nga lugar nga baluthangan matapos nga nagbato sa mga kapulisan.
Padayon nga ginabulong sa ospital ang duha pa ka mga biktima nga ginkilala kanday Telma Arabia y Bermejo, 74-anyos kag walo ka tuig nga bata nga ginkilala kay Prince Cyrel Celino nga nag-angkon sang pilas sa natuo nga abaga.
Kritikal ang isa pa ka bata nga ginkilala kay Hannah Fyl Lisa Aguiling,tatlo ka tuig ang edad nga ginabulong sa Health Centrum Hospital.
Suno sa inisyal nga imbestigasyon sang mga kapulisan, gulpi nga nagsulod sa poluy-an ang suspek kag hinali nga ginpanglabo ang mga biktima nga sanday Concepcion Celino, Ramilyn Labto kag Jaira Isabel Labto nga nag-angkon sang kapilasan sa nagkatuhay nga parte sang kalawasan kabangdanan sang ila kamatayon.
Matapos sini, iya man nga ginpanglabo ang mga persona nga iya makit-an.
Nahibaloan nga nagasuprer sang balatian nga prostate cancer ang suspek kag amu ang ginapahayag nagtulod diri agud nga mag-amok.
Padayon pa ang ginapatigayon nga imbestigasyon sang mga kapulisan sang Panay angut sa amu nga insidente.

Facebook Comments