HINIGARAN, NEGROS OCCIDENTAL – Padayon karon ang follow-up operations nga ginapatigayon sang mga utoridad angut sa pagka-sapo sang isa ka bangkay sang tawo sa kilid sang kampo sa Brgy. Candumarao, banwa sang Hinigaran may mga las 7:30 kahapon sang aga.
Ang bangkay sang lalaki gin identify nga si Benjie Carpio, 35 anyos, kasado, isa ka mangunguma kag pumuluyo sang Brgy. Calapi, Hinigaran.
Suno sa imbestigasyon sang Hinigaran Municipal Police Station nga nagpadulong sa istasyon si Candumarao Punong Barangay Greg Tiamsing agud ipabalo nga may bangkay sang isa ka lalaki nga nasapwan sa higad sang kampo sa amo nga barangay.
Gilayon nga nagpadulong ang Alert Team sa area may mga las 11 sang aga sa amo man nga adlaw kag gin-imbestigar ang natabo kag didto natukiban nga ang bangkay sang biktima ang may madamo nga pilas tuga sang pagbuno kag paglabo sa nagkalain-lain nga bahin sang iya lawas./DYHB NEWSROOM
