Pagadian City – Gipaslak na sa Pagadian City Police Station Detention Facility ang lalaki nga maoy gitudlong responsable sa pagpatay sa usa ka babaye nga ahente sa online sabong.
Malampuson nga nadakpan sa kapulisan ang suspetsado nga mipatay sa biktima nga si Cristy May Ayuman, 28-anyos, residente sa purok Hillside, Brgy. Nazareth niining syudad.
Ang suspetsado krimen nailhan nga si Frederico Bulanon III nga nasikop sa mismong pinuy-anan niini sa Brgy. Baloyboan ning dakbayan.
Gibasehan sa mga pulis sa pagdakop kang Bulanon ang ilang conversation sa messenger diin makita nga gipaninglan sa iyang utang ang suspek ug nagkasabot sila magkita sa lugar kun asa napalgang patay si Cristy May.
Mahidumduman nga kagahapon sa buntag patay nang napalgan ang biktima nga si Cristy May ug nakawalis na ang ibabaw nga bahin sa sinina niini sa sagbutan nga bahin sa Purok Talong, Brgy. Banale niining syudad.
Bisan sa lig-ong ebedinsya nga gihuptan sa kapulisan sama sa mga chat sa messenger ug isa ka kinambrasan sa nawong sa suspek, nangulipas gihapon kini ug hugot nga nihimakak nga dili siya ang responsable sa krimen.
Karong adlawa gikatakda nga ipasaka na sa kapulisan ang tukmang kaso nga atubangon sa suspetsado.
