Bayog, Zamboanga del Sur – Imbes sa balay tambalanan magpa-alim sa iyang samad ug bun-og sa lawas ang 30-anyos nga lalaki, prisohan hinoon ang gitugpahan niini human na-imbargohan og armas dihang natikalbong sa Purok 8, Poblacion, Bayog, Zamboanga del Sur alas 4:10 niadtong sabado sa hapon.
Daling niresponde ang kapulisan paingon sa Bayog Health Center human nakadawat og impormasyon nga dunay gitakin nga armas ang lalaki nga nadisgrasya.
Naila og nadakpan sa otoridad si Carlito Bation, empleyado sa Saint Peter Life Plan sa Buug, Zamboanga Sibugay.
Narekober gikan sa suspek ang calibre 45 nga pistola nga gisal-uban og magazine ug gipalapanan sa duha ka buhing bala.
Ang nadakpan nga suspek gibalhog sa Bayog Municipal Police Station samtang nahulat sa sunod nga lakang sa kapulisan.
