Lalaki nga nagabitbit armas sa Bagongbong, Lambunao naka-agi na patay sang tawo

753

*ILOILO – Ginkumpirmar sa RMN Iloilo ni Brgy. Bagongbong, Lambunao Punong Barangay Dhonald Catedrilla Agustino nga naka-agi na himo sang krimen si Louie Vicente alias Lipid.*

*Si Lipid ang lalaki nga ara sa viral video nga naga-uyat sang armas nga ‘dosteros’ kag ginpahayag nanaya sa iya kasimaryo.*

*Ang ‘dosteros’ kaangay sang debomba nga armas nga may duh aka bala. *

*Suno kay Punong Barangay Agustino, ari siya sa syudad sang Iloilo sang natabu ang insidente bangod gin updan niya ang SK chairman sang ila barangay para sa SK mandatory training.*

*Aminado si Agustino nga aware siya sang gun ban nga ginapatuman sa bug-os nga pungsod nga magalawig pa tubtob sa Lunes, Mayo 21.*

*Indi man matuod suno kay Agustino nga nagpabaya ang iya nga opisyal sang amo nga tion.*

*Sa pagkamatuod suno sa iya, ang naka-blue nga babaye sa video isa sa iya kagawad.*

*Subong man, sa amo nga tion, ginsaway na si Lipid sang iya mga Kagawad apang indi ini magpati.*

*Agud mapunggan ang anuman nga paglala sang sitwasyon, gin-estorya sang iya kagawad si Lipid sa mahinay nga paagi, gin-ulu-uluhan kag ginlaygayan agud indi makatuga sang mas dako nga gamo.*

*Basi sa impormasyon nga ginsugid kay Kap Agustino, tuman ka hubog si Lipid sang amo nga tion.*

*Gintu-ad man ni Kap Agustino nga indi na aktibo nga miembro sang ila barangay si Lipid kag talagsa lang niya nga makita.*

*Wala ini nagatambong sa barangay assembly, wala naga intra sa event sang barangay kag masami nga nagalakat kag talagsa lang nagapakita sa ila barangay.*

*Sang 2012 ukon 2013, ginpahayag ni Kap Agustino nga may krimen nga nahimo si Lipid kag nakapatay ini sang tawo paagi sa paglabo.*

*Daw kaangay nga bisan ang mga pumuluyo sa barangay ang halos ilu-ad na si Lipid.*

*Indi naman makumpirmar ni Kap Agustino kon bala nangtaya gid man ini sang armas sa isa ka mga residente sang ila barangay bangod wala siya sang natabo ang krimen kag wala sang may makasugid sa iya sang kumpleto nga detalye sang natabo.*

*Ginpasiguro naman ni Kap Agustino nga imbestigaran ang natabo kag nablotter naman ini sa ila barangay kag sa Lambunao Police Station. *

*Nagpasalamat man si Kap Agustino sa nagsend sang video sa RMN Iloilo bangod mahimo nila ini nga magamit bilang ebidensya batok kay Lipid. *

*Tags: Visayas, DYRI774, RMN Iloilo, Iloilo City*

Facebook Comments