Davao City – Personal nga bangi ang motibo sa pagpusil-patay sa usa ka lalaki sulod sa usa ka karenderia sa Cabantian, Buhangin, Davao City ala-1:20 kagahapon sa hapon (Enero 22, 2021).
Sa report sa Buhangin PNP, naila ang biktima nga si Antonio Gealon Jr., 42-anyos, minyo, residente sa Brgy. Cabantian, Davao City ug lumad sa Sta Maria, Davao Occidental.
Sa imbestigasyon, samtang naniudto ang biktima, kalit na lamang gisulod sa wala mailhing suspek ang kan-anan ug dayon gipusil kini tumong sa ulo niini resulta sa iyang hinanaling kamatayon.
Narekober sa Scene of the Crime Operatives (SOCO) sa crime scene ang tulo ka bala gikan sa gituohang .45 caliber pistol.
Padayong naglusad ang kapulisan og hot pursuit operation batok sa suspek nga kalit nga misibat padulong sa Barangay Indangan Road ning syudad human sa insidente.
RadyoMaN Kirby Manzon
